انتقد أحمد شوبير حارس مرمى الأهلي ومنتخب مصر السابق استمرار لعب فريق المصري خارج ملعبه على الرغم من السنوات الطويلة التي مرت على واقعة أحداث بورسعيد عقب مباراة الأهلي والمصري.

وقال أحمد شوبير في تصريحات إذاعية اليوم الإثنين: "أنا من أكثر الناس اهتماما بمشروع استاد النادي المصري الجديد أولًا لأنه بنية مصرية جديدة ستدخل ضمن منظومة الرياضة المصرية وأنا متأكد إنه هيدخل ضمن الاستادات المعتمدة من الكاف أنا واثق من كده".

وتابع شوبير: "السبب الثاني من سنة 2012 المصري جمّد لعبه مرة لمدة سنة، وبعد كده مبقاش بيلعب في ملعبه ثم بقى بيلعب في برج العرب وبعدها بقى بيلعب في السويس".

وأوضح شوبير: "وهفضل أقول مباراة الأهلي والمصري قدامك سنوات طويلة علشان يلعبوا في القاهرة وبورسعيد تاني، لكن بخلاف الأهلي من حق المصري يلعب كل مبارياته في ملعبه اللهم إلا إذا كان للأمن اعتراض على أي مباراة آخرى، وأنت كمسؤولين في بورسعيد كنت بتقول لي هيلعبوا على استاد المصري في ديسمبر اللي فات وداخلين على ديسمبر الجديد ومفيش حاجة".

وأضاف شوبير: "لما اتعملت قرعة الدوري لقيت المصري بيلعب في السويس برضه وده فيه ظلم للمصري وظلم للأندية اللي بتواجه المصري، ليه أنا مثلا كزمالك ألاعب المصري مرتين في السويس فأتمنى الأمر ده ينتهي على خير".